7NEWS.az millət vəkili Ramil Həsənin yazısını təqdim edir.

Ötən əsrin 80-ci illərinin sonunda SSRİ-nin çöküşünün fonunda Azərbaycanda başlanmış xalq hərakatı keşməkeşli hadisələrlə yadda qalıb. Bu mənada, xalq hərakatının "önündə” gedənlərin də kimliyi zaman keçdikcə bütün xalqımıza məlum oldu. Çünki xalq hərakatında millətini sevən, həqiqətən də onun azadlığı uğrunda mübarizə aparan şəxslərlə yanaşı, yaranmış vəziyyətdən sui-istifadə edən, "KQB”-yə agentlik edənlər də var. Bu hərakatda elə təsadüfi adamlar var ki, hətta onun "lideri” səviyyəsinə yüksəlmək iddiasında olub. Belələrindən biri də Nemət Pənahlıdır.
Nemət Pənahlının adı məhz o dövrün mitinqləri fonunda ictimaiyyət üçün məlum oldu. Adətən, milli azadlıq mübarizələrində xalqın önündə gedən şəxslərin cəmiyyətin qaymağı hesab olunan ziyalılar gedirdisə, heç bir ali təhsili olmayan, ziddiyyətli bir şəxsin – Nemət Pənahlının birdən birə xalq hərakatının "öndərlərindən” birinə çevrilməsi hələ də qaranlıq olaraq qalır. Məhz belə ziddiyyətlərin fonunda xalqının azadlıq mübarizəsində qoşulan həqiqi vətənpərvər bir çox ziyalılar o dövrün hərakatının rəhbərliyindən uzaqlaşdılar. Belə olan halda isə, meydan Nemət Pənahlı kimilərə qaldı. Bu adamın "KQB”nin cəsusu olması fikri isə zaman getdikcə özünü daha çox doğrultmaqdadır. Bunun isbatlarından biri də 20 Yanvar hadisələri zamanı baş verənlərdir. Sovet imperiyasının qoşunlarının xalqımıza qarşı silahdan istifadəcəyini hiss edən, məlumat əldə edən ziyalılar insanları meydanlardan dağılışmağa çağırsalar da, artıq özünü hərəkatın lideri hesab edən Nemət isə əksinə- xalqı meydanlara çağırırdı. 1990-cı il yanvarın 19-dan 20-ə keçən gecə baş verən qətliam isə bütün dünyaya səs aldı. Dinc, günahsız insanlar imperiyanın qurbanına çevrildi. Amma həmin gecə Nemət Pənahlı xalqın arasında olmadı.
Zaman keçdi, Azərbaycan dövlət müstəqilliyini elan etdi. Həmin dövrdən etibarən N.Pənahlı isə mövqesizlik nümayiş etdirir, sifətdən sifətə düşməyə davam edir. "maskalanmış” Nemət ötən illər ərzində sübut edib ki, o, milli azadlıq hərəkatından yalnız şəxsi məqsədləri üçün istifadə edib və onun milli dövlətçiliyimizə sadiqliyindən heç bir söhbət gedə bilməz. O, heç zaman "azadlıq aşiqi” olmayıb, əksinə, sadəcə   meydan elementi olaraq müəyyən xarici dairələrin xüsusi xidmət orqanlarının əlində alət kimi istifadə olunur.
Diqqət çəkən bir məqam da ondan ibarətdir ki, illər öncə özünə siyasi partiya yaradan  Nemət aktiv siyasi fəaliyyətlə məşğul olmayıb, "göbələk” kimi konkret olaraq hansısa mövsümdə gündəmə gəlməyə çalışıb. Onun gündəmə gəlmək cəhdi də müəyyən maraqlara xidmət edib, sifarişli olub. Məqsədi isə müstəqil dövlətimizin artan gücünə, inkişafına əks-fikirlər səsləndirmək, ictimai rəyi çaşdırmaq məqsədi  daşıyıb. 44 günlük Vətən müharibəsində də ölkəmizdə fəaliyyət göstərən siyasi partiyaların mütləq əksəriyyəti, siyasi, elm, mədəniyyət və ictimai xadimlər Ali Baş Komandana və şanlı ordumuza birmənalı dəstək göstərsə də, Nemət Pənahlının adı onların arasında yox idi. Bu fakt onun hansı əqidəyə xidmət etdiyi bir daha təsdiqləyir. Daha doğrusu, əqidəsizlik, mövqesizlik, satqınlıq və s. neqativ xüsusiyyətlər Nemətin tərcümeyi halının ən əsas cizgiləridir.  Beləliklə, meydan elementi kimi özünə "titul” qazanmış N.Pənahlının günü gündən inkişaf edən Azərbaycan haqqında hansısa mülahizə yürütmək, fikir və mövqe səsləndirməyə heç bir mənəvi haqqı yoxdur. Onun adı və bayağı "fikirləri” cəmiyyətimizdə yalnız ikrah doğura bilər. Bu səbəbdən də, Nemətin özünü cəmiyyətə siyasətçi kimi sırımaq cəhdi fiaskoya məhkumdur.
Yekun olaraq bir daha deyə bilərik ki, Azərbaycan dövlətinin xarici və daxili istiqamətdə həyata keçirdiyi islahatlar siyasəti ciddi uğurlu nəticələr verdiyi, bu istiqamətdə həyata keçirilən iradəli addımlar Azərbaycan dövlətinin və Azərbaycan xalqının milli maraqları nəzərə alınaraq  həyata keçirildiyi üçün şübhəsiz ki, bir çox xarici ölkələrin Azərbaycanın müstəqil dövlət kimi siyasət yürütməsini həzm edə bilməyən müəyyən xarici dairələr və xarici təhlükəsizlik strukturları tərəfindən narahatlıqla qarşılanır. Milli siyasətimiz həmin qüvvələrin məqsədlərinin reallaşmasına ciddi bir maneə və əngəl törətdiyi üçün Nemət Pənahlı kimi insanlardan proseslərə zərər vurmaq məqsədilə alət kimi istifadə edilməkdədir. Amma bir məqam dəqiq və aydındır ki, Azərbaycan dövləti və Azərbaycan xalqı dəmir yumruq kimi birdir, güclüdür. Azərbaycan dövlət başçısı Cənab İlham Əliyevin öndərliyində atılan bütün addımlar necə ki, Qarabağ savaşında Azərbaycan xalqının yumruq kimi birləşib düşmənin başını əzərək tarimar etdisə, ölkəmizin maraqlarına zərbə vurmaq üçün planlar cızan daxili və xarici qüvvələrin hər birini susdurmağa hazırdır. Azərbaycan dövləti bundan sonra da dövlət başçısının həyata keçirmiş olduğu bütün uğurlu siyasi istiqamətdə Azərbaycan xalqı birlikdə və bərabər vahid bir güc olaraq hərəkət edəcəkdir və Nemət Pənahlı kimi tör-töküntülərin bundan sonra da Azərbaycan siyasətində və siyasi mühitində heç bir zaman yeri olmayacaqdır.

Ramil HƏSƏN
Azərbaycan Respublikası Milli Məclisinin deputatı