"İrandakı səfirliyimizə qarşı törədilmiş terror aktı Azərbaycana qarşı son dövrlər aparılan kampaniyanın nəticəsidir”.

Bunu bu gün Milli Məclisin yaz sessiyası çərçivəsində keçirilən ilk iclasında deputat Kamran Bayramov bildirib.

Kamran Bayramov deyib ki, cinayətkarların ən ciddi məsuliyyətə cəlb olunması İrandan tələb olunmalıdır.

Deputat Nizami Səfərov beynəlxalq konvensiyalara əsasən səfirliyin qorunmasının İranın vəzifəsi olduğunu vurğulayıb: "Diplomatik nümayəndəliklərə hücumlar transmilli terror aktı kimi dəyərləndirilir. Konvensiyalara əsasən, səfirliyə hücumun hansı motivlə həyata keçirilməsindən asılı olmayaraq belə hücumlar terror aktı kimi qiymətləndirilir”.

Deputat Elnur Allahverdiyev qeyd edib ki, Tehrandakı səfirliyimizə hücum uzun müddət stimullaşdırılıb və hazırlanıb: "Çünki Vətən müharibəsində qələbədən sonra İran Azərbaycana qarşı aqressiv münasibət sərgiləyir, sərhədlərimizdə təlimlər keçirir. Digər tərəfdən, bu gün İranın Azərbaycandakı səfirliyinin necə qorunduğu göz önündədir. Həm də Azərbaycan ən stabil ölkələrdəndir.”.

Deputat Əminə Ağazadə beynəlxalq konvensiyalara əsasən diplomatik nümayəndəliklərin toxunulmaz olduğunu söyləyib: "Terrorizmin digər cinayətlərdən fərqi siyasi motivlərinin olmasıdır. Azərbaycanın uğurlarını isə İran həzm edə bilmir. Azərbaycanın səmimi qonşuluq mövqeyinə baxmayaraq, İran fərqli mövqedən çıxış edir. Səfirliyə hücuma görə İran beynəlxalq hüquqi məsuliyyət daşıyır”.

Deputat Elşən Musayev isə İranın terror aktının qarşısını qabaqcadan ala biləcəyini, ancaq bunu etmədiyini vurğulayıb. O, Azərbaycandakı radikal siyasi qüvvələrin İrandakı səfirliyimizə qarşı terror aktının qarşısında sərgilədiyi mövqeyi də qəbuledilməz sayıb.

Deputat Afət Həsənova səfirliyimizə qarşı terror aktının mola rejiminin Azərbaycana münasibətdə növbəti təxribatı olduğunu bildirib./apa