Bu münasibətlə "Davam" Gənclər Hərəkatının mərkəzi ofisi olan Bakı Dayaq Mərkəzində Sabir Rüstəmxanlı ilə 40-dan çox davamçı üzv arasında görüş baş tutub.

Görüşdə Azəri Türk Qadınlar Birliyinin sədri Tənzilə Rüstəmxanlı, Azərbaycan Kərkük Mədəniyyət və Əməkdaşlıq Mərkəzinin sədri Məlahət Qurbanova, "Gənclərin Təşəbbüsünə və İnkişafına dəstək" İctimai Birliyinin sədri Toğrul Allahverdili, "Yeni Çağ" Media Qrupunun baş redaktoru Aqil Ələsgər, "Veteninfo.Az" İnformasiya Agentliyinin təsisçi və baş redaktoru Nahid Canbaxışlı, Azərbaycan-Şimali Kipr Dostluq Cəmiyyətinin sədri Orxan Həsənoğlu və başqaları qonaq qismində iştirak edib.

Görüşü giriş sözü ilə açan "Davam” Gənclər Hərəkatının sədri Nihad Allahyarlı Sabir Rüstəmxanlını təbrik edib, onun Azərbaycanın ictimai-siyasi həyatında əvəzsiz xidmətlərindən, müsəqillik uğurunda mübarizəsindən, ziyalı ömür yolundan söhbət açıb.

Daha sonra sözü xalq şairi Sabir Rüstəmxanlıya verib.

Sabir bəy tələbəlik, gənclik illərindən, şeirlərinin, "Ömür kitabı”nın milli düşüncəmizin formalaşmasındakı rolundan söhbət açıb. Daha sonra 44 günlük Vətən Müharibəsinə həsr olunmuş "Qarabağa dönüş” poeması haqqında danışıb.

Səmimi söhbət əsnasında gənclərə maraqlı müzakirələr aparılıb. Sonra isə "Davam” Gənclər Hərəkatı adından təbrik plaketi Sabir Rüstəmxanlıya təqdim olunub.

Sonda xatirə fotosu çəkilib və Sabir Rüstəmxanlı hər bir iştirakçıya özəl imzası ilə "Qarabağa dönüş” poemasını hədiyyə edib.