"Fransa senatı Azərbaycan əleyhinə qətnaməni 295 səslə qəbul etdi. Qətnamə, erməni diasporası və onlara havadarlıq edən senatorlar tərəfindən irəli sürülmüşdür. Qərəzli olmaqla yanaşı, beynəlxalq hüquqa ziddir və reallıqla heç bir əlaqəsi yoxdur.”

7NEWS.AZ xəbər verir ki, bu fikirləri Milli Məclisin deputatı Nəsib Məhəməliyev söyləyib:

"Yaxın keçmişdə Əlcəzairdə, Ruandada milyonlarla insanı qətlə yetirmiş bir ölkə nə haqqla Azərbaycanı təcavüzkarlıqda, heç zaman törədilməmiş cinayətkarlıqda günahlandırır. Bütün imkanları ilə, Xocalıda və Azərbaycanın digər ərazilərində soyqırımlar, ağılla gəlməz qətllər törətmiş, 30 il qonşu ölkənin torpaqlarını işğalda saxlamış erməni terrorçularına himayədarlıq edir. Necə olur ki, dünyaya demokratiya dərsi keçən fransızlar, müxtəlif, bir-birinə zidd siyasi partiyaların təmsil olunduğu senat bir komanda ilə, yekdilliklə belə bir qanunsuzluğu təsdiq edirlər. Deməli, onların təlqin etdiyi demokratiya, ancaq özləri üçündür. Cavab birdir. Azərbaycanın 44 günlük müharibədə erməni bacılarının "məğlubedilməz” ordusunu darmadağın etməsi, işğala son qoyması. Qələbəmimizi həzm edə bilməmək. Eyni zamanda əzəli rəqibi, günü-gündən inkişaf edən və güclənən, keçmiş Fransa müstəmləkələri olan ölkələrdə biabırcasına sıxışdıran Türkiyəyə qarşı ədavət. Heç kimə sirr deyil ki, son illər, Afrikanın şimalında, Çadda, Liviyada, Malidə, Mərkəzi Afrikada, Nigeriyada, Burkino-fasoda, Livanda, Suriyada, İraqda, Şərqi Aralıq dənizində, eləcə də Cənubi Qafqazda, Rusiya-Ukrayna münasibətlərinin tənzimlənməsində, Fransa Türkiyə ilə ciddi rəqabət aparır və uduzur. Ona görə də, ölkə daxilindəki resurslarını, KİV-ləri, QHT-ləri, siyasi təşkilatları, qanunverici orqanın fəaliyyətlərini maksimum "türkəfobiya”, "islamofobiya” ətrafında cəmləşdirmişlər. Nəticədə, fransa cəmiyyətində Azərbaycanın, Türkiyənin simasında düşmən obrazının yaradılmasına nail olmuşlar. Təbii, belə bir siyasət Fransanın dövlət maraqlarına nə siyasi, nə də ki, iqtisadi maraqlarına cavab vermir. Cənubi Qafqaz bölgəsinə isə, əlavə gərginliklər gətirir. Cavabın adekvat olacağına şübhə yoxdur.

Burada, Ermənistanın mövqeyini xüsusi vurğulamaq istərdim. Bu ölkə məğlubiyyətdən düzgün nəticə çıxarmadı və sülhü yox, konfrantasiya yolunu tutdu. Növbəti dəfə Geosiyasi güclərin əlində maşa rolunu oynamağa üstünlük verdi. Bir şeyi tez unutdu. Bu dəfə Dəmir yumruqdan xilas ola bilməyəcək.”

"Fransa Senatının qəbul etdiyi qətnamə təxribat xarakteri daşıyır”

7NEWS.AZ xəbər verir ki, bu fikirləri Milli Məclisin deputatı İlham Məmmədov söyləyib: "Bu qətnamə həqiqətdən uzaqdır və Azərbaycan - Ermənistan arasında sülh müqaviləsinin imzalanmasının qarşısını almaq üçün qəbul edilmişdir. Qətnamədə adı çəkilən qondarma "Dağlıq Qarabağ" ifadəsi Fransanın reallıqları qəbul etmədiyini göstərir. Senatorlara səslənərək demək istəyirəm ki, 44 günlük vətən müharibəsindən sonra "Dağlıq Qarabağ" tarixin arxivinə göndərildi. Azərbaycan öz gücü hesabına işğal altında saxlanılan torpaqları azad etməklə suverenliyini bərpa etdi. Qarabağ Azərbaycanın tərkib hissəsidir, bu torpaqlar və orada yaşayanlar haqqında verəcəyimiz qərarlar bizim daxili işimizdir. Biz bunu heç bir tərəflə müzakirə etməyə hazırlaşmırıq. Mövcud qətnamənin erməni lobbisinin təsiri ilə qəbul edildiyi hiss olunur. Fransa hökumətinin siyasi iradəsizliyi adıçəkilən ölkədə ermənilərin söz sahibinə çevrilməsinə səbəb olub. Ancaq nə olursa olsun Azərbaycan heç vaxt haqq mübarizəsindən və haqq sözündən dönməyəcək. Biz düşmənə həm döyüş meydanında, həm də siyasi müstəvidə layiqli cavab verməyi yaxşı bilirik. Düşmən və onun havadarları 44 günlük müharibəni xatırlasınlar. Azərbaycan XXI əsrin müharibəsini aparan dövlətdir. Cənubi Qafqazda ən böyük və ən qüdrətli dövlət olaraq biz daim sülhün və sabitliyin təmin olunması üçün çalışırıq və bu istiqamətdəki fəaliyyətimiz davamlı olacaq. Fransa Senatının Azərbaycana qarşı qəbul etdiyi əsassız iddialar və iftiralar ilə dolu qətnaməni qətiyyətlə rədd edir, ölkəmizə qarşı belə təxribatları kəskin şəkildə pisləyirik.”

"Fransa Senatının qəbul etdiyi qətnamə ikiüzlülüyün növbəti nümunəsidir”

7NEWS.AZ xəbər verir ki, bu fikirləri Milli Məclisin deputatı Elşən Musayev söyləyib: "Fransa Senatının qəbul etdiyi qətnamə riyakarlığın, yalanın və ikiüzlülüyün növbəti nümunəsidir. Bütün bəşəriyyət həmin qətnaməni qınamalı, pisləməli, Fransaya öz etirazını bildirməlidir. Niyə? Çünki Fransa bu addımı ilə bir daha sübut etdi ki, terrorçu Ermənistanın yanındadır, ədalətdən uzaqdır və hər şeyə yalnızca öz bəsit, yırtıcı, nadan prizmasından baxır. Erməni dostu olan və erməni diasporasından qidalanan insanların təşəbbüsü və müəllifliyi ilə reallaşan həmin qətnamə başdan ayağa, birinci cümlədən sonuncu cümləyə qədər yalan və iftiradan ibarətdir.”

Mənsur Mustafayev

Material Azərbaycan Respublikasının Medianın İnkişafı Agentliyinin maliyyə dəstəyi ilə hazırlanmışdır. İstiqamətin kodu 6.3.8