“Məlum hadisəyə görə bütün məsuliyyət İran dövlətinin və hökümətinin üzərindədir!” – BƏYANAT

“Məlum hadisəyə görə bütün məsuliyyət İran dövlətinin və hökümətinin üzərindədir!” – BƏYANAT
 

Azərbaycanın İrandakı səfirliyinə edilən hücum birmənalı şəkildə terror aktıdır və İranın hökümət, hakimiyyət orqanları, həmin orqanların nümayəndələri hər nə qədər bunu təkzib etməyə çalışsalar belə, əksini sübut edə bilməyəcəklər! Çünki məişət səviyyəsində belə planlı cinayət hadisəsi olmur. Baş vermiş cinayət geniş həcmlidir və əgər fədakar mühafizəçilərin ayıq-sayıqlığı, cəsurluğu olmasaydı bütün səfirlik əməkdaşları qətlə yetirilə bilərdi, cinayətin masştabı tamam başqa miqyasda olardı.

Heç şübhəsiz ki, məlum terroru təşkil edənlər, planlayanlar törətdikləri cinayətə görə mütləq bir şəkildə, üstəlik beynəlxalq səviyyədə cavab verəcəklər. Fəqət, bir məqamı xüsusən vurğulamağı özümüzə borc bilirik: Səfirlik bizim suveren ərazimizdir və onun müdafiə zəmanəti, eyni zamanda təhlükəsizlik təminatı həmin səfirliyin yerləşdiyi dövlətin üzərindədir. Daha dəqiq desək: İranın borcu idi ki, bizim səfirliyimizi, bizim suveren ərazimizi qorusun. Amma qoruya bildimi? Xeyr, qoruya bilmədi. Ya da qorumaq istəmədi. Və beləcə, qonşuluq siyasətinə də xəyanət etdi, beynəlxalq hüququn prinsiplərini də görməzdən keçdi, konvensiyalara da zidd davranış sərgilədi.  

İranın son vaxtlar Azərbaycana qarşı yürütdüyü siyasət adekvat olmayıb və bu günki terroru da həmin qeyri-adekvat siyasətin, münasibətin davamı kimi qiymətləndiririk. Eyni zamanda xüsusi vurğu ilə bildiririk ki, məlum hadisəyə görə bütün məsuliyyət İran dövlətinin və hökümətinin üzərindədir.

 

Azərbaycan Demokratik Maarifçilik Partiyası

Xəbər lenti