Milli Məclisin deputatı Müşfiq Cəfərov "Mostbet” adlı provayderin qanunsuz reklamları, sosial şəbəkələrdə aparılan qumar və bu kimi mərc oyunları barədə çoxsaylı şikayətlərə münasibət bildirib.

 

Deputat Pravda.az-a açıqlamasında deyib ki, nəinki "Tik Tok" platformasında, hətta digər sosial şəbəkələrdə  dələduzluqlar real həyatdakı qanunsuzluqlar kimi dəyərləndirilib, cəza tətbiq olunmalıdır.

 

"Təəssüf edirəm ki, sosial şəbəkələrin rahatlığından istifadə edən, nəinki bir neçə şəxs var, hətta onlayn şirkətlər belə mövcuddur. Bu cəhətdən də düşünürəm ki, sosial şəbəkələrdəki reklamlar müəyyən mənada nəzarətdə saxlanılmalıdır. Əfsuslar olsun ki, hələ bu sahədə ciddi bir təcrübə yoxdur. Sosial aləmdə baş verənlərə mütləq şəkildə nəzarət edilməlidir ki, insanlar nəyi reklam etdiklərinin fərqində olsunlar. Bu elə bir sahədir ki, nəzarət olduqca çətindir. Ümid edirəm, tezliklə sosial platformalarda həyata keçirilən qanunsuz qumar, mərc oyunlarının reklamları dövlət tərəfindən tənzimlənəcək, bu reklamların qarşısı alınacaq. Hazırda sosial şəbəkələrdən kifayət qədər böyük məbləğlər qazanan şirkətlər var ki, onlar bunun qarşısında heç bir vergi ödəmirlər. Bu da ölkədə ənənəvi sahibkarlığa bir növ zərər vurur", - deputat bildirib.

 

Qeyd: Tanınmış aktrisa Pərvin Abıyeva sosial şəbəkədə qanunsuz mərc oyunları ilə bağlı gedən müzakirələrdə bildirib ki, mərc oyunlarında bəxtini sınayır, amma "Mostbet” adlı provayder onun udduğu 5 min manatı ödəmir. Bu, "qara bazar”ın təmsilçisi "Mostbet” adlı provayderin külli miqdarda uduşları ödəmədiyi ilə bağlı səslənən ilk fakt deyil. Bir müddət əvvəl Ayaz İkramoğlu adlı vətəndaş da mediaya açıqlamasında deyib ki, "Mostbet”dən udduğu 156 min manatı ala bilməyib. Çox maraqlıdır ki, bu şirkəti Azərbaycanda bir çox tanınmış simalar reklam edir.