Növbəti erməni təxribatlarının arxasında duran kimlərdir?

Sentyabrın əvvəlində sülh sazişinə doğru sürətli addımlar atılırdı. Avropa İttifaqının Grezidenti Şarl Mişelin təşəbbüsü ilə Avropada, paralel olaraq Putinin hakimliyində Rusiya ərazisində gedən müzakirələrdə bir çox anlaşmalar əldə edilmişdi. Ancaq həmin vaxt rəsmi İrəvan bütün prosesi pozdu: Sentyabrın ilk günlərindən Ermənistan silahlı qüvvələri və Qarabağda hələ də qalmış qanunsuz silahlı birləşmələr atəşkəsi davamlı olaraq pozdular, informasiya təxribatları da paralel olaraq həyata keçirildi. Sentyabrın 12-də isə ermənilər bütün cəbhə boyunca genişmiqyaslı təxribat törətdilər və 3 gün şiddətli döyüşlər davam etdi. Nəticədə ermənilərin dişini növbəti dəfə sındırdıq, daha bir dəmir yumruq yedilər.

Bundan az sonra sülh gündəliyi üzrə danışıqlar daha da intensivləşdi, Paşinyan da, onun bəzi havadarları da anlamış oldular ki, sülhə gəlməkdən başqa çıxış yolu qalmayıb.

Ancaq görünən budur ki, Ermənistan növbəti sülh gözləntisi ərəfəsində də ənənəvi təxribatlarını davam etdirir. Yenə də sərhəddə davamlı olaraq atəşkəsi pozurlar, yenə də informasiya cəbhəsində təxribatlar törədirlər.

Son olaraq belə yalan tirajlamışdılar ki, guya Azərbaycan Ordusunun bölmələri bir-birinə və ermənilərin mövqelərinə atəş açıb.

Azərbaycan Müdafiə Nazirliyi bunu dərhal təkzib etdi: "Azərbaycan Ordusunun bölmələrinin guya əvvəlcə bir-birinə, daha sonra isə qarşı tərəfin mövqeləri istiqamətində atəş açması ilə bağlı Ermənistan müdafiə nazirliyinin yaydığı məlumat yalandır. Heç bir real əsası olmayan bu uydurma məlumatı qəti surətdə təkzib edirik”.

Belə görünür ki, Ermənistan sülhü könüllü şəkildə istəmir, yenə də öz pozucu xislətinə sadiqdir. Ortaya bir sual çıxır: sülh müzakirələrində pozitiv açıqlamalar verən Paşinyan növbəti dəfə ikiüzlülük edir, orduya atəş, informasiya təxribatçılarına növbəti əmr verir, yoxsa bu antisülh prosesini həyata keçirənlər Paşinyanın bacarmadığı revanşistlərdir? Ekspertlər hansı versiyanı daha məntiqli hesab edir? Və bu durumda Azərbaycan hansı mövqeyi tutmalıdır?

Demokratik Maarifçilik Partiyasının sədri, deputat Elşən Musayev: "Məsələnin, problemin kökü ilk növbədə Paşinyanın özünün ciddi adam olmaması ilə bağlıdır. Yəni səbəb hər nə olursa-olsun, nəticə etibarilə sülh müqaviləsinin ən azından bu günə qədər imzalanmaması birbaşa Paşinyanın zəif xarakteri və yürütdüyü qeyri-adekvat siyasətlə əlaqəlidir. Adam iki əlində 4 qarpız saxlamaq istəyir. Üstəlik, onu da anlamır ki, buna nə gücü var, nə resursu, nə də qabiliyyəti. Ona görə itirə-itirə gedir və maraqlı məqamlardan biri də odur ki, sülh müqaviləsinin imzalanmasının elə ilk öncə Ermənistanın özü üçün nə qədər vacib olduğunu Paşinyandan savayı hər kəs görür, anlayır, dərk edir. Ermənistanın baş naziri isə hələ hamının könlünü almaq və bu minvalla hakimiyyətini qorumaq dirənişindədir. Hamının könlünü almaq deyərkən, əsasən revanşistləri nəzərdə tuturam. Hansı ki, birbaşa erməni diasporuna pərçimlənib. Əslində Ermənistanın öz daxilində iki fərqli qüvvənin savaşı gedir, Sorosçularla diasporçuların savaşı. Üstəlik, bunların heç biri xalqa bağlı deyil, xalqın maraqlarından çıxış etmir. Paşinyan isə müstəqil qərar qəbul edən fiqur olmadığına görə yeganə çıxış yolunu zaman uzatmaqda, prosesi məchul bir dövrə transfer etməkdə görür. Amma onun bu cəhdləri alınacaqmı, səmərə verəcəkmi? Əlbəttə ki, yox. Çünki Paşinyan özbaşına deyil. O, sülh müqaviləsini imzalamağa məcburdur. Hətta məhkumdur. İmzalamasa, daha betər problemlərlə baş-başa qalacaq və məhz həmin problemlərin fonunda hakimiyyətdən gedişini öz əli ilə sürətləndirəcək. Yəni iki yol var: ya revanşistlərdən qorxmamaq və onların mümkün təzyiqlərini gözə almaq, ya da sülh müqaviləsinin imzalanmasını uzadacağı, ləngidəcəyi halda özünü və dövlətini daha rəzil kökə salmaq. Hər halda, birinci yol daha optimaldır. Çünki revanşistlər əsasən klan xarakterində fəaliyyət göstərir və xalq içində elə də böyük nüfuza malik deyillər. Belə olan halda isə Paşinyana, sadəcə, bir az təpər və özgüvən lazımdır ki, kimsəni eşitmədən və həyatında ilk dəfə xalqının mənafeyindən çıxış edərək gəlib sülh müqaviləsini imzalasın.