12 yanvar 2023 tarixində Medianın İnkişafı Agentliyinin (MEDİA) yaranmasından iki il ötür.

7NEWS.az xəbər verir ki, Agentlik iki il öncə Prezident İlham Əliyevin Fərmanı ilə media sahəsində islahatlar, bu sektorun təkmilləşdirilməsi və peşəkarlaşdırılması məqsədilə yaradılıb.

Agentliyin əsas məqsədi media subyektlərinin inkişafına şərait yaratmaq, həmçinin, onların iqtisadi müstəqilliyinin gücləndirilməsi istiqamətində tədbirlər görməkdir.

MEDİA yarandığı gündən jurnalistlər üçün müxtəliflər təlimlər, seminarlar keçirir. Bu təlim və seminarlarda xarici və yerli media mütəxəssisləri iştirak edib.

Agentliyin fəaliyyəti ilə bağlı 7NEWS.az-a açıqlama verən millət vəkili İlham Məmmədov ölkəmizdə mətbuatla bağlı ardıcıl siyasətin yürüdüldüyünü dedi: "Ölkə Prezidenti Cənab İlham Əliyevin "Azərbaycan Respublikasında Media sahəsində islahatların dərinləşdirilməsi haqqında" 2021-ci il 12 yanvar tarixli,1249 Fərmanı ilə  media sahəsində islahatlara başlanılmışdır. Bu isə təbii ki, dövlətimizin başçısının bütün sahələrə olduğu kimi medianın inkişafı naminə həyata keçirdiyi uğurlu təşəbbüslərdən biridir. Ölkəmizdə möhtərəm Prezidentin təşəbbüsü ilə mətbuatın tərəqqisi istiqamətində ardıcıl görülən işlər, kütləvi informasiya vasitələrinin inkişafına göstərilən maddi dəstək, ümumilikdə media işçilərinə göstərilən qayğı və diqqət  dünya miqyasında bənzəri olmayan bir təcrübə, təqdirəlayiq nümunədir. Bildiyimiz kimi Milli Mətbuat Günündə 20-dək ölkədən olan xarici media nümayəndələri, ekspertlər və yerli media nümayəndələri daxil olmaqla ümumilikdə 200 nəfərin iştirakı ilə Şuşa şəhərində "Mediada qlobal trendlər, yeni çağırışlar” Beynəlxalq Media Forumunun keçirilməsi medianın inkişafına, həmçinin konstitusiyamıza uyğun olaraq mətbuat azadlığının təmin olunmasına verilmiş töhfədir. Bununla yanaşı media nümayəndələrinin fərdi bacarıqlarının təkmilləşdirilməsi, dövlət və cəmiyyət üçün prioritet təşkil edən məsələlərin həllində jurnalistlərin potensialından səmərəli istifadə olunması, onların tədqiqatlarının aparılmasının stimullaşdırılması məqsədilə müvafiq qaydada davamlı tədbirlər həyata keçirilir."