Milli Məclisin Mədəniyyət Komitəsinin sədri Qənirə Paşayeva, Şuşa təsviri sənət məktəbinin layiqli davamçısı, tanınmış rəssam Rövşən Bayramovun Azərbaycan Rəssamlar İttifaqının Vəcihə Səmədova adına sərgi salonunda keşirilən "Şuşanın qədim məhəllələri” adlı açılış mərasimində çıxış edib.

Q.Paşayeva Milli Məclisin Mədəniyyət Komitəsinin mənəvi dəstəyi, "NƏFƏS” İB, "Avrasiya Beynəlxalq Araşdırmalar İnstitutu” İB, "Regional Hüquqi və İqtisadi Maarifləndirmə” İB-nin təşkilatçılığı ilə "Şuşanın qədim məhəllələri” adlı keçirilən sərginin 28 may – Müstəqillik Günü ərəfəsində təşkilinin təsadüfi olmadığını bildirib: "Bu il 28 Mayı bir başqa ovqatda keçiririk. 2022-ci il "Şuşa İli”dir və ilk dəfə olaraq 28 Mayı öz əsl adı ilə - rəsmi olaraq Müstəqillik Günü olaraq bayram edirik. Şuşanın azadlığından bəri bütün bayramlarımız kimi 28 May da bayram kimi bayramdır. Belə bir ovqatda və zamanlamada, Şuşada doğulub, boya-başa çatmış, işğal gününədək Şuşada yaşayıb-yaratmış rəngkarın – Şuşa təsviri sənət məktəbinin layiqli davamçısının sərgisini keçirmək çox xoşdur. Bu, Rövşən Bayramovun Bakıda Şuşa mövzusunda ilk fərdi sərgisi olmaqla da xüsusi anlam daşımaqdadır. İnşallah iyun ayında, əlaqədar dövlət orqanları və könül dostlarının dəstəyi ilə Rövşən müəllimin Şuşada da sərgisini keçirməyi planlaşdırırıq.  

Rövşən Bayramovun əsərlərində Şuşanın təbiət təsvirlərini, tariximizi yaşadan sehirli guşələrini, zərif döndərməli küçələrini, yurd həsrətini, ümumiyyətcə insanın, torpağın taleyini görürük. Rəssamın kətana işlədiklərində ağır ömür yükünün də, ölməyən ümid və doğrulan inamın da təcalla etdiyini görürük.  

Şuşanın tanınmış aydınlarından Mehrab həkimlə İbrahim xan nəslindən olan İsmət xanımın övladı olan Rövşən Bayramov kübar mühitdə böyüyüb. Onun ilkin estetik zövqünün formalaşmasına ailəsinin önəmli təsiri olub. Valideynləri  incəsənətə ruhən bağlı olub və təsadüfi deyil ki, onların bir oğlu arxitektor-zərgər, biri dəmir üzərində döymə sənətinə yiyələnib, Rövşən müəllim isə rəngkarlığı seçib. Keçmiş SSRİ-də məşhur olan Əzim Əzimzadə adına Rəssamlıq Məktəbində təhsil alan Rövşən Bayramov dövrünün görkəmli rəssamlarından rəngkarlığın sirlərini öyrənib, incəsənət ocağını uğurla bitirib. Bundan sonra isə öz yaradıcılıq arzu və planlarını gerçəkləşdirmək üçün doğma Şuşaya dönüb. Əsasən klassik üslubda işləyən rəssamın Şuşada sənət uğurları az olmayıb. O dönəmin ümumrespublika, ümumittifaq miqyaslı yarışmalarında uğurla iştirak edib.

Rövşən Bayramov işğalaqədərki Şuşa abadlığında öz fırçası ilə yaxından iştirak edib.

1982-ci ildə Şuşada qurulmuş Dövlət Rəsm Qalereyasına direktor təyin olunan Rövşən Bayramovun təşkilatçılıq bacarığı sayəsində bu sənət ocağı qısa vaxtda nəinki Qarabağın, eləcə də respublikamızın tanınmış mədəniyyət mərkəzlərindən birinə çevrilib.

I Qarabağ müharibəsinin ilk illərindən Rövşən Bayramov da, doğma şəhərinin müdafiəsinə qalxıb, gecələr keşikçi məntəqələrində elinin keşiyini çəkib.

Ötən illər Şuşasız qalan Şuşa rəsm Qalereyası Rövşən Bayramovun başçılığı ilə boyu Bakıda fəaliyyətini davam etdirib. Rəssam ötən illər içində, qala şəhərin bütün məhəllələrini yağlı boya ilə kətana köçürüb, memarlıq incilərimiz olan Şuşa məscidlərinə aid tablolar, ümumən Şuşaya həsr olunmuş 100-dən çox əsər işləyib. Bu əsərlər respublikamızda və xarici ölkələrdə şəxsi kolleksiyaları bəzəməkdədir.

Nəzərə alsaq ki, rəssamın təsvir etdiyi tarixi abidələrimizin bir çoxu, işğal illərində dağıdılıb yaxud özgələşdirilməyə çalışılıb, ona görə də , həmin abidələrin bərpası prosesində Rövşən Bayramovun Şuşaya aid təsvirlərinin də özünəməxsus bir qaynaq olduğuna inanıram.

Rəssamımızı bir daha təbrik edir, möhkəm can sağlığı, yeni sənət uğurları diləyir, sərginin təşkilində əməyi keçən hər kəsə təşəkkür edirəm”!