Özbəkistanda “Bir səfirin manifesti” kitabının təqdimatı keçirilib

Özbəkistanda “Bir səfirin manifesti” kitabının təqdimatı keçirilib

LOBBİ.az xəbər verir ki, Daşkənddəki Dünya İqtisadiyyatı və Diplomatiya Universitetində Azərbaycan xarici İşlər nazirinin müavini, ölkəmizin ABŞ-dakı ilk səfiri, "ADA” Universitetinin rektoru, professor Hafiz Paşayevin "Bir səfirin manifesti” kitabının təqdimat mərasimi keçirilib.

Tədbir ölkəmizin Özbəkistandakı səfirliyi və bu qurumun nəzdindəki Heydər Əliyev adına Azərbaycan Mədəniyyət Mərkəzinin təşəbbüsü ilə baş tutub.

Universitet rektoru Abdujabbor Abduvaxidov, Özbəkistan parlamentinin Senat sədrinin birinci müavini Sadık Safoyev, Azərbaycanın Özbəkistandakı səfiri Hüseyn Quliyev çıxış edərək, özbək dilində çap olunan "Bir səfirin manifesti” kitabının gənc və peşəkar diplomatlar üçün əhəmiyyətindən, Bakıda dünya standartlarına uyğun yaradılan "ADA” Universitetinə H.Paşayevin uğurla rəhbərlik etməsindən danışıblar. Natiqlər onun alim, diplomat, müəllim kimi yüksək keyfiyyətlərə malik olduğunu, ABŞ-da səfir işlədiyi dövrdə Azərbaycan həqiqətlərinin yayılması və təbliği sahəsində böyük işlər gördüyünü, ABŞ-ın 20 ştatının Xocalı faciəsini soyqırımı kimi tanımasında H.Paşayevin danılmaz əməyinin olduğunu vurğulayıblar. Dünyanın 16 ölkəsinin Xocalı faciəsini soyqırımı kimi tanıması Azərbaycan diplomatiyasının uğuru adlandırılıb.

Hafiz Paşayev kitabın özbək dilində çapı üçün göstərilən dəstəyə görə təşəkkürünü bildirib. O, əsərin yaranmasından, ABŞ-da səfir kimi fəaliyyətindən, "ADA” Universitetinin yaradılmasından danışıb. Universitetdə dörd istiqamət üzrə kadrların hazırlandığını vurğulayan rektor bildirib ki, hazırda "ADA”da 2500 tələbə təhsil alır, məzunların 80 faizi işlə təmin olunur: ”Biz nə ediriksə, ölkəmizin sabahı, Azərbaycanın gələcəyi üçün edirik”.

Təqdimatın sonunda Hafiz Paşayev "Bir səfirin manifesti” kitabını imzalayaraq tələbə və müəllimlərə hədiyyə edib.

Tədbirdə Universitetin müəllim və tələbələri, eləcə də Özbəkistanda yaşayan soydaşlarımız iştirak ediblər.




Xəbər lenti