X Qlobal Bakı Forumu dünyanın geosiyasi düzəninə mühüm töhfələr verir.

Bunu AZƏRTAC-a açıqlamasında QHT sədri, siyasi ekspert Səbuhi Abbasov bildirib. O qeyd edib ki, Forumda qlobal dünya nizamını təhdid edən mühüm problemlər müzakirə olunur. Bundan başqa, beynəlxalq tədbirdə enerji təhlükəsizliyinə yaranan təhdidlərin həlli yolları, həssas bölgələrdə sülh, əməkdaşlıq və inteqrasiya, qloballaşan dünyada artan ədalətsizliklər, yoxsulluğun qarşısının alınması üçün qida və kənd təsərrüfatı sektorunun transformasiyası kimi mühüm mövzularda səmərəli müzakirələr aparılır.

QHT sədri qeyd edib ki, postpandemiya dönəmi də Forumun əsas müzakirə mövzularındandır. Onun sözlərinə görə, Forumun iştirakçılarının yüksək sosial statusa malik olması mühüm əhəmiyyət kəsb edir. Belə ki, forumda sülh, təhlükəsizlik, əməkdaşlıq, sabitlik və inkişaf prinsipləri çərçivəsində dialoq imkanlarının genişləndirilməsi üçün mühüm platformadır.

Səbuhi Abbasov bildirib ki, Prezident İlham Əliyev Forumun açılış mərasimində çıxışında qlobal gündəliyin aktual məsələləri ilə bağlı Azərbaycanın mövqeyini və sülh quruculuğu ilə əlaqədar təcrübəsini diqqətə çatdırıb. Həmçinin Azərbaycanın sülh quruculuğu ilə bağlı səylərini və Qoşulmama Hərəkatı müstəvisində yeni uğurlu əməkdaşlıq təcrübəsini təqdim edib.

Onun sözlərinə görə, Qlobal Bakı Forumunun dünya əhəmiyyətli diskussiya platformasına çevrilməsi Azərbaycanın da beynəlxalq müstəvidə təsirini artırıb, mövqelərini möhkəmlədib və ölkəmizi dünyaya, dünyanı ölkəmizə daha yaxşı tanıtdırmağa imkan yaradıb. Ekspert əlavə edib ki, bu platforma ölkəmizin dünya siyasətindəki gücünün ən mühüm göstəricisidir.